Bu barədə “Speech2Text” şirkətinin baş direktoru Andrey Seqrenev bildirib.

Onun fikrincə, əsasən söhbət intellektual xidmətləri müstəqil göstərən mütəxəssislərdən gedir: repetitorlar, özəl fəaliyyət göstərən psixoloqlar, marketoloqlar, dizaynerlər, redaktorlar və məsləhətçilər. Gəlirin artırılması imkanları peşədən və mütəxəssisin işinin hansı hissəsini süni intellektə ötürməsindən asılıdır.

“Neyron şəbəkənin sadəcə qoşulması xidmətlərin qiymətini artırmır. Gəlir o zaman yüksəlir ki, mütəxəssis hazırlıq və inzibati əməliyyatlara sərf etdiyi vaxtı azaldır, boşalan saatları isə yeni müştərilərə, daha mürəkkəb layihələrə və ya əlavə bacarıqların inkişafına yönəldir”, deyə Seqrenev izah edib.

Onun qiymətləndirməsinə görə, süni intellekt təkrarlanan əməliyyatların 60 faizədək hissəsini avtomatlaşdıra bilər. Belə ki, bulud xidmətləri və açıq API sistemləri standart yazışmaları, avtomatik cavabları, görüş xatırlatmalarını, hesabatların hazırlanmasını, görüş qeydlərinin xülasəsini və yerinə yetirilən işlərin ilkin keyfiyyət yoxlamasını öz üzərinə götürə bilər.

Ekspert bildirib ki, frilanserlər üçün bu cür alətlər qismən rəqəmsal köməkçi funksiyasını yerinə yetirir. Onun sözlərinə görə, bu, inzibati işlərə sərf olunan vaxtı azaldır və ayrıca əməkdaş işə götürmədən daha çox layihə idarə etməyə imkan verir.

Məsələn, repetitorlar süni intellektdən konkret şagirdin səviyyəsinə uyğun tapşırıqlar hazırlamaq, dərs planları tərtib etmək və məşqləri ilkin yoxlamaq üçün istifadə edə bilərlər. Seqrenevin sözlərinə görə, bu, dərslərə hazırlıq vaxtını azaltmağa, dərs sayını artırmağa və ya şəxsi kurs yaratmağa imkan verir.

Psixoloqlara isə neyron şəbəkələr cədvəllərin idarə olunmasında, müştərilər üçün məlumat materiallarının hazırlanmasında və anonim iş qeydlərinin sistemləşdirilməsində kömək edir. Bununla belə, ekspert hesab edir ki, peşəkar nəticələr və qərarlar mütəxəssisin özündə qalmalı, müştərilərin şəxsi məlumatları isə xarici xidmətlərə ötürülməməlidir.

“Proqramçılar üçün süni intellekt kod yaratmağa, vahid testlər yazmağa və sistem səhvlərini tapmağa kömək edir. Mexaniki işləri neyron şəbəkələrə həvalə etməklə İT mütəxəssisləri əlavə komandalar və xərclər cəlb etmədən layihələri genişləndirə və peşəkar təcrübələrinin keyfiyyətini artıra bilirlər.

Nəhayət, dizaynerlər üçün süni intellekt nümunələr axtarmağa, rəng palitraları yaratmağa, maket və prototiplər hazırlamağa kömək edir. Bu isə strategiya, analitika və planlaşdırma ilə bağlı daha konseptual və dərin işlər üçün vaxt yaradır”, – deyə Seqrenev bildirib.

Onun sözlərinə görə, frilanserlərin gəlir artımı üçün iki əsas ssenari mövcuddur. Birinci variant əvvəlki işi daha sürətli yerinə yetirmək və daha çox layihə qəbul etməkdir. İkinci variant isə qənaət olunan vaxtı peşəkar inkişaf üçün istifadə etmək və sifarişlərin orta qiymətini artırmaqdır.

Ekspertin fikrincə, ən nəzərəçarpan gəlir artımı süni intellekti yalnız ayrı-ayrı sorğular üçün deyil, bütün iş prosesinə inteqrasiya edən və hər iki yanaşmanı birləşdirən mütəxəssislərdə müşahidə olunur.